ملخص الحرب العالمية الثانية بالدارجة pdf

السلام عليكم ومرحبا بكم في الدرس الرابع من الباك بالدارجة، بعد ما شفنا ملخص درس الثورة الروسية و ازمات الديمقراطيات الليبرالية، الدرس اللي عندنا اليوم هو ملخص الحرب العالمية الثانية بالدارجة الف وتسعمية وتسعود وثلاثين الف وتسعمية وخمسة وربعين 1939-1945, فشناهوما اسباب الحرب العالمية الثانية؟ وشناهما مراحل الحرب العالمية الثانية؟ وشناهما نتائج الحرب العالمية الثانية؟ إذا ندوزو باش غنجاوبو على السؤال لول اللي هو :

اسباب الحرب العالمية الثانية 

بالنسبة للأسباب عندنا اسباب غير مباشرة وسبب واحد هو اللي مباشر وخلا الحرب تبدا :

أسباب غير مباشرة 

فأول سبب غير مباشر وهو مخلفات الحرب العالمية الأولى كيما شفنا في درس العالم غداة الحرب العالمية الأولى pdf, اللي هوما معاهدات الصلح او معاهدات الذل اللي تكرفصات فيه الدول الرابحة على الدول اللي خسروا مزيان فالحرب، من بينهم المانيا واللي تفرضات عليها معاهدة ڤرساي وغاترجعوا للحرب العالمية الأولى وغاتعرفوا اهم البنود اللي جات بها هاد المعاهدة .

اما السبب الغير المباشر التاني وهي الأزمة الإقتصادية الكبرى لسنة 1929 الف وتسعمية وتسعود وعشرين واللي ضربات كاع الدول الرأسمالية من بينهم المانيا .

اما السبب الثالث الغير المباشر وهو ظهور الدول الديكتاتورية بحال النازية فالمانيا بقيادة الزعيم هتلر والفاشية فإيطاليا بقيادة موسوليني وهاد الدول خرجوا من عصبة الأمم او الديكتاتوريات كيتوسعو ويستعمرو فالدول بحال المانيا اللي كانت البارح مزيرة بمعاهدة فيرساي تخلصات منها وسلحات الجيش وبدات كتوسع فالنمسا وتشيكو سلوفاكيا اما ايطاليا توسعت فإتيوبيا اما اليابان توسعت فمعظم الأراضي الصينية ايوا عصبة الأمم ماقدراتش توقفهم من بعد غاتشكل المانيا واليابان وايطاليا حلف سموه بالمحور، طوكيو برلين روما، ولكن هادشي كامل والحرب مازال ما بدات حيت هادو اسباب غير مباشرة.

السبب المباشر 

اما السبب المباشر وهو هجوم المانيا بقيادة هتلر على بولونيا مطلع شتنبر الف وتسعمية وتسعود وتلاتين 1939 ولي خلا فرنسا وبريطانيا يقولو لالمانيا سحبي القوات ديالك فبولونيا ولا مغيعجبك حال، وهنا المانيا مغتسحبوهمش ايوا غتعلن فرنسا وبريطانيا الحرب على المانيا.

مراحل الحرب العالمية الثانية 

وبدات الحرب العالمية الثانية وهاد الحرب العالمية الثانية كانوا فيها جوج ديال المراحل المرحلة الاولى من الف وتسعمية وتسعود وثلاثين تال الف وتسعمية وتنين وربعين 1939-1942 كانوا كينتصروا فيها دول المحور اللي هوما المانيا ايطاليا واليابان.

المرحلة الأولى 

ففي المرحلة الاولى من الحرب العالمية الثانية غتبدا بغزو المانيا بقيادة هتلر لدولة بولونيا وغتهجم المانيا وتوسع على جميع دول اوروبا الغربية ومن بينهم فرنسا، وغتستعمر المانيا فرنسا فالف وتسعمية وربعين 1940 والمانيا غتقصف فبريطانيا وغتوجه المانيا ديريكت للاتحاد السوفيتي فالف وتسعمية وواحد وربعين 1941 وغتهجم قوات خرين من المانيا وايطاليا على النجليز فمصر حيت مصر كانت محتلاها انجلترا اما بالنسبة لليابان فتوسعت بزاف ديال الدول من بينهم الصين والهند، والغلط لي دارت هو غتقصف القاعدة الامريكية بيرل هاربر هادشي في المرحلة اللولة لي كانوا كينتصرو فيها غير دول المحور نكملو.

المرحلة الثانية 

اما بالنسبة للمرحلة التانية غتبدا بدخول الولايات المتحدة الامريكية الحرب مع الحلفاء لي هوما فرنسا وبريطانيا والاتحاد السوفياتي ضد المحور لي هوما اليابان، المانيا وايطاليا فبدات بخسارة المانيا فمعركة ستالينغراد ضد الاتحاد السوفيتي فالف وتسعمية وتلاتة وربعين 1943 ومني ربحو الاتحاد السوفياتي حرروا اوروبا الشرقية من المانيا, موراها غاينتاصروا الحلفاء على المانيا وايطاليا فمعركة العلمين فمصر، وغيهبطوا الحلفاء فشاطئ النورماندي فالف وتسعمية وربعة وربعين 1944 وغيحرروا اوروبا الغربية وغيحررو تا فرنسا، وبكثرة هاد الهزائم اللي تلقاتها المانيا وايطاليا غيستسلمو فألف وتسعمية وخمسة وربعين 1945 اما اليابان مازالة مقاتلة مع ميريكان وما حساتش بالحرب وباش ميريكان يوقفو هاد الحرب ويخليو اليابان ستسلم لاحو ليهم جوج قنابل نوويتين وحدة فهيروشيما والثانية فناكازاكي واستسلمات اليابان تا هي في الف وتسعمية وخمسة وربعين 1945. 

نتائج الحرب العالمية الثانية 

وبطبيعة الحال مكيناش شي حرب كتسالي بلا نتائج بشرية واقتصادية وسياسية واجتماعية 

النتائج البشرية 

فالنتائج البشرية فارتفع عدد القتلى لكتر من خمسين 50 مليون قتيل وكان عدد كبير من المعطوبين والمفقودين

النتائج الاجتماعية

 اما النتائج الاجتماعية فارتفعت البطالة والفقر وتشردو السكان 

النتائج الاقتصادية

اما النتائج الاقتصادية فبما ان الحرب وسط اوروبا فراه المصانع والحقول تحرقو يعني اي حاجة متعلقة بالإقتصاد تدمرات وتنقصو المواد الغذائية حيت قبل كانوا كيشريو الدول غار السلاح باش يتحاربو تاحد مداها فالإقتصاد، ايوا من مورا الحرب هادشي غتستغلو الولايات المتحدة الأمريكية ورفعات من الإنتاج ديالها ولات كتصدر وتبيع ليهم المواد الغذائية للدول الأوروبية ولي بغاوها كتعطيها ليهم وديك الساعة غتولي ميريكان اول قوة اقتصادية عالمية.

النتائج السياسية

اما بالنسبة للنتائج السياسية فتقصمات المانيا لأربع مناطق نفوذ يعني استعمروها ربعة الدول وانقسم العالم لمعسكرين شرقي بقيادة الإتحاد السوفياتي وغربي بقيادة الولايات المتحدة الأمريكية وغتأسس هيئة الأمم المتحدة لي جات بنفس اهداف أو مبادئ عصبة الامم وهي الحفاظ على الامن والسلم العالمي بين الدول ديال العالم، اوا سلك، هكا غنكونو سالينا ملخص درس الحرب العالمية الثانية، كيف ديما تقدر دير تحميل درس الحرب العالمية الثانية 1939-1945 pdf من تحت، ياالله تشااو نتلاقاو فدرس جديد، الله اوفق ????.