تلخيص درس الثورة الروسية و ازمات الديمقراطيات الليبرالية بالدارجة pdf

الثورة الروسية و ازمات الديمقراطيات الليبرالية بالدارجة, سلام عليكم قبل ما نبدا في الدرس بغيت نقول لصحاب ثانية باكالوريا و باك حر ان الدروس لي بقاو في مادة التاريخ هوما ازمة العالم الرأسمالي الكبرى الف وتسعمية وتسعود وعشرين. استغلال استعماري في عهد الحماية ودرس الحركات الإستقلالية بالمشرق العربي. فغنحاول ان شاء الله نديرهم قبل الباك انا عارف ما بقى ليه والو غير هو راني تا انا عندي التزامات نتمنى انكم تفهموني ولكن ان شاء الله را غنديرهم.

كنا دوينا قبل على ملخص درس العالم غداة الحرب العالمية الأولى دابا غنجيو للدرس الثاني في مادة التاريخ من برنامج الباك بالدارجة ديال الثانية باكالوريا لي هو الثورة الروسية وازمات الديموقراطية الليبرالية فكيفما عندكم في العنوان, فالعنوان طويل حيت مقسم لجوج ديال العناوين كاينة الثورة الروسية بوحدها وازمات الديمقراطيات الليبرالية بوحدها نبداو بالثورة الروسية وقبل غنجاوبو على اسئلة لي في الدرس، شناهوما عوامل واسباب الثورة الروسية وشناهوما مراحل الثورة الروسية وشناهوما خطوات ارساء النظام الإشتراكي السوفيتي في عهد لينين وسطالين؟ وشناهوما اهم ازمات لي عرفاتها الديمقراطية الليبرالية؟ نبداو بعوامل الثورة الروسية

عوامل الثورة الروسية

بالنسبة للعوامل فعندنا عوامل سياسية وعوامل اقتصاد والعوامل العسكرية. 

العامل السياسي للثورة الروسية 

روسيا كان فيها النظام القيصري. يعني القيصر هو اللي كيحكم البلاد. وكان مستبد. وما كيلبيش الطلبات ديال الشعب. وكيعطي الامتيازات غير للنبلاء ورجال الدين والكولاك. والكولاك هوما الفلاحين الكبار. عقل عليها مزيان. الكولاك هوما الفلاحين الكبار. وعندهم اراضي شاسعة يعني كانت فوارق طبقية بين نبلاء ورجال الدين والكولاك كان فرق بيناتهم و بين الفقراء والعمال والفلاحين الصغار فمكانش لي كيدافع على هاد الطبقة أو سخطو.

الثورة الروسية العوامل الاقتصادية

اما بالنسبة للعوامل الاقتصادية فروسيا كانت كتعتامد على الفلاحة وماشي شي فلاحة نيت المهم ديباني يا وطني وكان فرق كبير ما بين الفلاحين الكبار لي هوما الكولاك والفلاحين الصغار ولي هما الموجيك فالكولا كانوا كيستغلوا الموجيك بشكل لي كبير وحقوقهم مهضومة كيفما كنقولوا حنا كيحرتوا بهم مزيان بلا مقابل لي زوين. 

العوامل العسكرية للثورة الروسية 

اما بالنسبة للعوامل العسكرية فروسيا الغلط لي دارت هو دخلات للحرب العالمية الاولى مع الوفاق والحلفاء لي هما فرنسا وبريطانيا بلا متكونشي مستعدة للنيت داكشي لي خلاها تاكل العصا ديال بصح خصوصا من عند المانيا في الحرب العالمية الاولى وكانوا عدد الضحايا اللي ماتوا في الجيش الروسي اغلبيتهم من اولاد الشعب وتخسرات فلوس كثيرة في الحرب على السلاح والماكلة ديال الجنود واي حاجة متعلقة بالحرب، هادوك الفلوس اللي تخسروا في الحرب خلات روسيا ترفع من الاسعار ديال المواد الغذائية المهمة وتزاد الفقر والبطالة وهادشي كامل غيخلي تبان الثورة الروسية.

دابا هدرنا على عوامل الثورة الروسية دابا غندوزو لمراحل الثورة الروسية.

مراحل الثورة الروسية

 فكيفما قلنا دوك الاسباب والعوامل خلات الثورة الروسية تبان والثورة كانوا فيها جوج ديال المراحل.

المرحلة الأولى ثورة فبراير 

ثورة فبراير في الف وتسعمية وسبعطاش 1917 بدات بمظاهرات واحتجاجات ديال الشعب ودخل معهم للجيش، وتما القيصر غيتنازل على العرش وغتشكل حكومة مؤقتة اغلبيتها برجوازية، وتسمات بالحكومة البرجوازية واللي بقات مستمرة في الحرب يعني ما خرجاتش من الحرب لا هادي بقات مستمرة في الحرب وما قدراتش تلبي مطالب الشعب منها انهم يخرجوا من الحرب هادو من بين المطالب اللي كان باغيهوم الشعب وزيد سخطة على سخطة.

المرحلة الثانية ثورة أكتوبر 

المرحلة التانية ديال الثورة الروسية في 1917 الف وتسع مية وسبعطاش وكتسمى ثورة اكتوبر مع البلاشفة بقيادة لينين واللي طيحات بالحكومة المؤقتة البرجوازية وتشكلات حكومة فرع بقيادة لينين وهنا الله اجعل البركة غنساليو مراحل الثورة الروسية. دابا غندوزو ل

خطوات ارساء للنظام الاشتراكي مع لينين و ستالين 

اجراءات لينين لترسيخ النظام الإشتراكي 

وغنبداو بلينين لي دار بزاف ديال الاجراءات باش يرسخ النظام فمن بين الحوايج لي دار لولى هو خرج من الحرب العالمية الأولى والحاجة التانية هي تلغات الملكية العقارية الكبرى يعني تا حد ما غتكون عندو ارض وتا حد مغيملك تا شي حاجة كلشي غيولي تابع للدولة. 

والحاجة التالتة وهي تأميم الأبناك والمصانع يعني الشركات والمصانع كلشي غيولي ديال الدولة والرباح كيبقى للدولة يعني المصنع اللي كان ديالك رجع ديال الدولة ورباحك كيمشي للدولة وكتدي غير شوية ديال الفلوس بحالا خدام وصافي بحالك بحال العمال اللي مخدم.

اما الاجراء الرابع وهو عطى للقوميات حق تقرير المصير فكانوا بعض المناطق تابعين لروسيا فلينين جا قال اليوم بيتي تبقاو معانا مرحبا بيكم مبغيتوش توما تعرفوا قرروا راسكم وهاد الاجراءات كاملين لي دار معجباتش وحد الطبقة لي هي بطبيعة الحال الطبقة البرجوازية اللي شافت راسها اتخسر اراضيها ومصانعها وشركاتها اللي كانت البارح ديالهم واليوم ولات ديال الدولة.

وتا الدول الرأسمالية ماعجبهمش الحال حيت هاد النظام من بين المبادئ ديالو كي الفقير كي الغني وهنا البورجوازيين اينوضو حرب ضد الحكومة أسّسوا الجيش الأبيض ودعماتهم الدول الرأسمالية، غتقول ليا الدول الرأسمالية اش دخلهم في روسيا؟ انا غنقول ليك فهاد الدول الرأسمالية عندها النظام الرأسمالي، لا مشى تا النظام الإشتراكي سدق فروسيا. فراه غينتشر فأوروبا. وهادشي هوما ما بغاوهش. وداكشي علاش كيدعمو البرجوازيين احدو من التوسع ديالو.

وكيفما قلنا البرجوازيين دارو الجيش الأبيض ضد الجيش الأحمر بقيادة طرونتسكي وهاد الجيش الأحمر ديال البلاشيفا بقيادة طرونتسكي العشير والصديق ديال لينين وتسمى بالجيش الأحمر زعما لون الدماء داكشي علاش سماوه الأحمر، وعلم الإتحاد السوفياتي الا رديتيليا البال فيه المنجل والمطرقة يعني الإتحاد السوفياتي ومسيرينو غير العمال والفلاحين.

وبدات الحرب الأهلية بين الجيش الأحمر والجيش الأبيض الحرب الأهية يعني وسط البلاد من الف وتسعمية وتمنطاش تال الف وتسعمية وواحد وعشرين 1918-1921 وانتصر الجيش الأحمر فلخر ولكن تزادت تكفسات على الدولة بسباب الحرب، حيت اغلبية الفلوس وفائض الإنتاج لي دارت الدولة خسراتو على الحرب الأهلية فهنا لينين غايفكر ويعتق الموقف وغيدير لينا السياسة الاقتصادية الجديدة او هاد السياسة غتخليه يرجع اللور ويرجع النظام الرأسمالي تاينتاعش الوضع وينتعش الاقتصاد ديك الساعة غيرجع للنظام الاشتراكي. 

الخطة السياسية الاقتصادية الجديدة للينين

ففي الميدان الصناعي خلا اصحاب المقاولات الصغرى الربح اللي جابوه يديوه وينفاتحو على الاسواق الخارجية ويجيبو خبراء اجانب، اما في الميدان الفلاحي فمبقاش كيحيدو الأراضي للفلاحين ومبقاوش كيديو ليهم فائض الإنتاج غير يبقاو الفلاحين يخلصو الضرائب فقط، اما في الميدان التجاري فحرروا التجارة الداخلية فهادشي لي طرا في عهد لينين فاش بغا يرسخ النظام الإشتراكي السوفياتي في روسيا فمات لينين وجا بعدو ستالين

سياسية التخطيط لستالين

وفي عهد ستالين لي تولى الحكم سنة الف وتسعمية و ربعة وعشرين 1924 فباش يرسخ النظام الاشتراكي ويكمل داكشي اللي بدا ستالين، دار سياسة التخطيط أو هنا غاينتقل فيه الاتحاد السوفياتي لانه مبقاش سميتو روسيا ولا سميتو الاتحاد السوفياتي من بلد سلاحي ضعيف إلى البلد صناعي قوي اعتمد على الصناعة التقيلة وغيحيد السياسة الاقتصادية الجديدة اللي دار الليلين وغيحيد اي حاجة متعلقة بالرأسمالية يعني هذا غيدخل الاشتراكية مئة بالمئة.

وفعلا سياسة التخطيط نجحات فتزاد المردود الفلاحي بشكل لي كبير وولى الاتحاد السوفياتي كيعتامد على الصناعة بزاف فستالين رد الاتحاد السوفيتي دولة قوية دابا غندوزو للفقرة لخرانية والعنوان الثاني ولي هي :

ازمات الديمقراطيات الليبرالية 

فمورا أو غداة الحرب العالمية الاولى بزاف ديال الدول منهم الدول الديمقراطية الليبرالية بحال فرنسا وطاليان، فالطاليان مورا الحرب العالمية الاولى تراجعات عندها الفلاحة وارتفعوا الاسعار ولات عندها البطالة والفقر وانخفضت القدرة الشرائية عند المواطنين الشئ اللي غايخليهم تاهوما يخرجوا بدورهوم في احتجاجات ومظاهرات كما دارت روسيا والسلطة الديموقراطية كانت ضعيفة، احزاب يدابزو على الحكم تما غيطلع الحزب الفاشي بقيادة الديكتاتور موسوليني وعقل عليه مزال غنهضرو عليه في الحرب العالمية التانية وغترجع ايطاليا ديكتاتورية بقيادة موسوليني.

 اما فرنسا فخرجات هي رابحة من الحرب العالمية الاولى ولكن خسرات بزاف ديال الحوايج باش تربح فولات عندها ازمة مالية وكلا عندها الاقتصاد العصا مزيان وتضرر وتا هي ولات عندها البطالة والفقر وتا هما ولا عندهم احتجاجات ولي خلات انه يتزعزع الاستقرار السياسي، ودازو بزاف د الحكومات في فترة لي قصيرة ولكن بقا نظامها ديمقراطي عكس ايطاليا لي يرجع نظامها ديكتاتوري.

خلاصة 

هاد تغيير الأنظمة من الديمقراطية للديكتاتورية غيكون من أسباب الحرب العالمية الثانية ودابا غنكونو سالينا الدرس ديالنا نتمنى انه يعجبكم. تقدرو ديرو تحميل درس الثورة الروسية و أزمات الديموقراطية الليبرالية pdf من تحت، يالله تشاو ♥️.