بالدارجة أزمة العالم الرأسمالي الكبرى 1929 pdf

عندك 3 دقايق فهم الدرس و غتلقى الدرس pdf لتحت و الله اعونك, اول حاجة غنشرحو بعض المصطلحات ديال الدرس ديالنا اليوم أزمة العالم الرأسمالي الكبرى، منهوم 

اولا البورصة

 هي واحد البلاصة كتسمى بسوق الأوراق المالية وهي واحد السوق منظم كيتباع فيه وكيتشراو الحصص والأسهم والتساندات.

ثانيا الأسهم

 او السهم فهو يكون عندك واحد النصيب او حصة فشركة معينة بحال شي شركة ديال جوج د الناس او واحد عندو خمسين فالمية فديك الشركة او التاني عندو خمسة وربعين فالمية او نتا عندك خمسة فالمية را كتربح حسب الحصة اللي عندك في الشركة يعني ارباحك حدها خمسة فالمية.

تالتا قانون العرض والطلب

 فمتلا غنديرو متال بالدلاح والصيف هدا متلا الدلاح هاد العام كتير ولكن لي بغى يشريه قليل يعني الدلاح تعرض بشكل لي كبير ولكن لي بغى يشريه قليل يعني باش يبيعو داك الدلاح اش خاصهم يديرو خصهم يهبطو من التمن ديالو حيت العرض كتر من الطلب اما الى كان قليل ولكن لي بغا يشريه كثير فراه كيزيدو في الثمن ديالو حيت الدلاح قليل وهنا غيكون صعيب يشريوه الناس لي طلبوه وغيكون مشكل عند الناس لي كيبيعوه يعني العرض قليل والطلب كثير وهنا غنفهمو ان العرض والطلب ديما خصو يكون قد قد، العرض قد الطلب باش تا حد ما يتضرر رابعا شرحت لك هاد المصطلحات باش ما تلقاش مشكل في الدرس ديالنا اليوم اللي هو

 ازمة العالم الرأسمالي الكبرى. 

كالعادة غندوزو للاسئلة اللي غنجاوبو عليهم في الدرس, فاشناهما مظاهر انطلاق الازمة الاقتصادية الكبرى لسنة الف وتسعمية وتسعود وعشرين 1929؟ وشناهوما اسباب انطلاق الازمة؟ وكيفاش انتقلت الازمة الى باقي القطاعات الاخرى والعالم كامل؟ وشناهوما التدابير المتخدة من الدول باش يواجهوا هاد الازمة؟ 

انطلاق الأزمة الكبرى لسنة 1929 

أزمة العالم الرأسمالي الكبرى 1929 انطلقت نهار الخميس ربعة وعشرين 24 اكتوبر واللي كيتسمى بالخميس الأسود وبالضبط فبورصة وول ستريت اللي كان غيتباع فيها اكثر من طناش المليون سهم ولكن الطلب على الأسهم كان قليل بالزاف تما هبطت القيمة ديال الأسهم بشكل كبير ونهارت قيمة الشركات والمستثمرين مابقاوش عندهم الفلوس وهوما غا مسلفين من عند الابناك والابناك قالوا للمستثمرين ردو لينا فلوسنا والمستثمرين كيما قلنا معندهومش الفلوس ومعندهومش منين يردو ليهم شي حاجة.

ولات الازمة ضاربة حتى الابناك والابناك دات الديور وداكشي كاع اللي كيملكو المستثمرين البارح المستثمرين كانوا عايشين مزيان واليوم ولاو فقراء. 

أسباب انطلاق الازمة العالمية 1929

السبب الاول

بالنسبة للسبب ديال انطلاق أزمة العالم الرأسمالي الكبرى فكان خلل فالعرض والطلب فمن مورا الحرب العالمية الأولى كانت ميريكان زاهية، فلوس موجودة نعاماس وهادشي لي جا هضرت عليه في الدرس اللول ديال العالم غداة الحرب العالمية الأولى,وتقدر ترجع ليه كيما قلنا كانت الفلوس موجودة وكانت كتنتج بشكل لي كبير، الفلّاحة كيزرعو بشكل لي كبير ويحصدو ويبيعو بزاف في المنتوجات الفلاحية والمصانع كتصنع وتنتج وتصدر وتبيع بشكل لي كبير تاهي.

تال الف وتسعمية وتسعود وعشرين فالمصانع و الفلّاحة كينتجو كتر وما كاينش لي يشري حيت ما كانتش السلعة كتباع غا فميريكان كانت كتباع تا برا د الولايات المتحدة الأمريكية خصوصا الدول لي تضررو فالحرب العالمية الأولى ولي هوما الدول الأوروبية فمني اوروبا بنات اقتصاد جديد مورا الحرب او ما بقاوش محتاجين للسلع الأمريكية ايوا تما حصلات السلعة فميريكان او هبط التمن ديال السلعة ديال بصح حيت ايلا ما هبطش الثمن ما يقدروش يبيعوها وخلات الفلاحين والمصانع اللي كانوا طامعين في الربح اكثر خسروا بزاف ديال الفلوس. 

السبب الثاني 

كما قلت مورا الحرب العالمية الأولى ميريكان كانوا زاهيين ديك الوقيتة والأبناك سهلات القروض اللي بغا يتسلف مرحبا به واللي بغا يفكر يولي غني كاتبان له اسهل طريقة وهو يشري شي سهم وبتمن اللي قليل ومني ارتفع غايبيعوا بتمن طالع ويربح فيه الفلوس وباش يشري الأسهم كيتسلف من عند البنكة وولاو بزاف ديال الناس كيتسلفو من عند البنكة ويشريو في الأسهم والأسهم بدا التمن ديالهم كيطلع حيت كلشي ولا باغيهم، ونتوما عارفين الحاجة الى كيكثر عليها بنادم مكتكملش.

فمني شراو بزاف د الناس الأسهم مغيلقاوش لمن يبيعوها هنا بداو كيحسو بالخطر وكلشي بغا يتفك من هاد الأسهم وفاش جاو يبيعوهم جاو عدد كبير دقة وحدة بغاو يبيعو الأسهم تما هبط التمن ديالهم بشكل لي كبير حيت العرض كان كتر من الطلب، 

انتقال الأزمة للقطاعات الأخرى

قطاع الاستثمار 

فمني بدات أزمة العالم الرأسمالي الكبرى وماكينش لي يشري الأسهم حيت العرض كان كتر من الطلب دوك لي شراو الأسهم بالكريدي ماقدوش يردو الكريديات للبنكة وبزاف ماردوش الكريديات للبنكات البنكة غضربها ازمة تا هي وما غيبقاش عندها ما تسلف لشي حد. 

القطاع الفلاحي 

اما القطاع الفلاحي فالفلاحين زرعوا وحصدوا بزاف المنتوجات الفلاحية. وفاش جاو يبيعوهم لقاو الطلب عليها قليل وحصلت المنتوجات الفلاحية فالفلاحين. وباعوهم بالخسارة وصدقوا ما ربحوش وما ردو تا راس المال. والمشكلة تا هوما مسلفينها من عند البنكة. ومني ما ردوش الفلوس للبنك، البنكة دات ليهم الأراضي او هنا الفلاح مسكين ما ربح لا ارض لا راحة ولا فلوس. شتو البنكة شحال خايبة؟

القطاع الصناعي 

 اما القطاع الصناعي فالسلعة اللي كيصنعو تا هي طاحت قيمتها وما بقاتش كتباع بالثمن ديالها. حيت السلعة كثيرة وتا هما حصلات فيهم ديال بصح. ولات متكدسة في المصانع. عطا الله السلعة. وهنا المصانع ما بان ليهم والو من غير يجريو عل الخدامة تنقصو عليهم المصاريف.

القطاع الاجتماعي 

اما القطاع الاجتماعي فمني جراو المصانع على لخدامة تزادت البطالة وطاحت قيمة القدرة الشرائية مبقاوش الناس كيشريو كيما قبل وهبطو الأجور وتزاد الفقر دابا غنعرفو كيفاش انتقلت الأزمة من الولايات المتحدة الأمريكية للعالم كامل فميريكان مور الحرب العالمية الأولى ولا كلشي مرتبط بها وكانت دارت مشاريع بزاف فالدول الأوروبية بزاف ديال الفلوس باش يعاودو يبنيو اقصات جديد وقدمت ليهم العديد من المساعدات ولكن غير ضربات الازمة الولايات المتحدة الامريكية سحبات الرساميل ديالها ومبقاتش كتساعدهم وطلبات منهم يردو ليها الكريديات ديالها لي كتسال وضربات الازمة الدول الاوروبية تا هي. 

وباش الدول الاوروبية يتفكو من ازمة العالم الكبرى الحل الوحيد هو يستغلو المستعمرات ديالهم باش يغطيو الأزمة بحال فرنسا وبريطانيا لي عندها بزاف ديال المستعمرات وبزاف ديال الدول لي استعمراتهم غتستغلهم مزيان باش متبانش الأزمة فأوروبا ايوا تما غضرب الأزمة حتى المستعمرات يعني العالم كامل ضرباتو الأزمة من غير الدب الروسي اه سمحوليا الدب السوفياتي او الإتحاد السوفياتي، نظام اشتراكي وكتناقد مع الدول كاملين لي كان عندهم النظام الرأسمالي. 

ودابا غاندوزو للفقرة الأخيرة وهي 

اساليب مواجهة الأزمة الإقتصادية الكبرى 

بالنسبة للاساليب فالرئيس الأمريكي روزفلت جاب واحد الخطة سماها الخطة الجديدة او النيوديل باش يواجهو هاد الأزمة فانتقلات فيها الرأسمالية من الرأسمالية الحرة للرأسمالية الموجهة، الدولة غتولي توجه الاقتصاد وهاد الخطة كتقدم فيها الدولة مساعدات اقتصادية بحال مساعدات الفلاحين ونضمو الابناك والبورصة المؤسسات الصناعية والدولة طيحات من الدولار شوية باش تشجع المبادرات الخارجية والاستثمار وخفضات من الرسوم الجمركية ودارو بزاف ديال المشاريع كبار باش تخدم فيها الناس لي مشومرين يعني البطاليين. 

ولكن كانوا بعض المعارضين لهاد الخطة حيت قالوا بلي الدولة ولات كدخل في الاقتصاد بحال نظام الاشتراكي ولكن واخا هادشي كامل لي قالوا فراه هاد الخطة نجحات وعطات مفعول ديالها بان واحد الإنتعاش فالاقتصاد وارتفع مؤشر الانتاج الصناعي ومؤشر الاجور ومؤشر المواد الفلاحية ومبقاتش البطالة نقصات بشكل كبير وهاكا بدات كتخرج الولايات الامريكية من ازمة العالم الرأسمالي الكبرى. 

خلاصة 

اما خلاصة القول. تا هاد الأزمة كانت من اسباب الحرب العالمية التانية. نتمنى يكون الدرس عجبكوم و غتلقاو تحميل درس الازمة العالمية الكبرى 1929 pdf لتحت ياالله نشوفكوم في درس جديد باي ????.