ملخص ملف مساهمة المغرب في الحرب العالمية التانية

السلام الخوت كيما ديما خود ليك 3 دقايق قرا هادشي بشوية عليك او كن على يقين بأنك غتخرج فاهم ملف مساهمة المغرب في الحرب العالمية الثانية مزيان، إذن من بعد ما قرينا ملخص الحرب العالمية الثانية بالدارجة, و تبعنا ليه ملخص الاستغلال الاستعماري للمغرب في عهد الحماية، اليوم غنرحب بكم فدرس جديد لي هو درس ديال مساهمة المغرب في الحرب العالمية التانية، وغنشوفو اهمية مشاركة المغرب في الحرب العالمية التانية، ومجموعة من الظروف لي خلات ان المغرب يساهم في الحرب العالمية الثانية؟ ونتائج هذه المساهمة.

عوامل مساهمة المغرب في الحرب العالمية الثانية 

اول نقطة غنجاوبو فهاد درس ملف (مساهمة المغاربة في الحرب العالمية الثانية) هي العوامل لي دفعات المغرب للمشاركة في الحرب العالمية التانية، هنا لي خاصكم تعرفو هو ان المغرب كان تحت الاحتلال الفرنسي انداك ورغم ذلك راه ساهم الى جانب دول الحلفاء الى تحرير اوروبا وفرنسا خصيصا، من الديكتاتورية الفاشية الايطالية والنازية الالمانية.

وهاد الاسباب يمكن لنا نلخصوهم في النقط التالية :

السبب الاول هو دعوة السلطان محمد الخامس

هنا السلطان محمد الخامس دار واحد الدعوة للشعب المغربي الى مؤازرة فرنسا ماديا وعسكريا، ولكن السؤال لي خصنا نطرحوه هو إلا ديك الوقت المغرب كان تحت الاحتلال الفرنسي لماذا دعم فرنسا في الحرب العالمية الثانية؟ والسبب هو ان السلطان محمد الخامس انذاك تلقى وعد من الرئيس الأمريكي على مساعدة المغرب لنيل استقلاله وحرياته مقابل تعاون المغرب ودخوله الحرب العالمية الى جانب دول الحلفاء. 

النقطة الثانية ايمان المغرب بقيم السلم والتحرر والسيادة.

النقطة الثالثة هو الموقع الجغرافي ديال المغرب حيث ان دول الحلفاء اعتبروا المغرب وخاصة انجلترا والولايات المتحدة الأمريكية اعتبروا المغرب قاعدة اساسية للقضاء على الديكتاتوريات هادشي لان الأراضي المغربية شكلت نقطة انطلاق للعمليات العسكرية والحربية لدول الحلفاء في منطقة البحر الأبيض المتوسط موقع الجغرافي ديال المغرب مكّن ان دول الحلفاء تصد الجيوش الألمانية والإيطالية.

اما النقطة الأخيرة فهي نداء المقيم العام بالمغرب سنة الف وتسعمية وتسعود وثلاثين 1939, ودعوته الفرنسيين والمغاربة في منطقة الحماية للدفاع على الوطن. 

اذا كما شفنا المساهمة ديال المغرب في الحرب مكانتش غير مالية واقتصادية او مكانتش غير مادية, بل كانت مساهمة بشرية ايضا، حيث ان الشعب لم يستجب لفرنسا بل استجاب لنداء سلطانه انذاك، وقام بدعم بكل حيوية ونشاط جهود فرنسا وحلافائها، وبالتالي ساهم لانه دول الحلفاء تحقق النصر سنة الف وتسعمية وخمسة وربعين 1945 ويربحوا في الحرب العالمية الثانية.

مظاهر مساهمة المغرب في الحرب العالمية التانية

دابا غنشوفو مظاهر مساهمة المغرب في الحرب العالمية التانية. 

المساهمة اللوجيستيكية المغربية

اول مساهمة عندنا هي المساهمة اللوجيستيكية المغربية، وهادشي على الموقع الاستراتيجي ديال المغرب، شي لي خلا دول الحلفاء يتاخدو المغرب خاصة وبلدان شمال افريقيا عامة قاعدة لانطلاق الهجوم على المانيا وايطاليا, هادشي علاش قوات الحلفاء نزلوا في سواحل الدار البيضاء والمهدية والمحمدية.

المساهمة العسكرية المغربية

ثاني نقطة هي المساهمة العسكرية المغربية، حيث ان مجموعة من الفرق العسكرية التحقات بدول الحلفاء هادشي لي خلا ان المغرب يعرف خسائر بشرية كبيرة تجلات في الفين وتمنمية وتلاتة وتمانين 2883 قتيل وطناش الف وربعمية وخمسة وتسعين 12495 جريح وربعمية وسبعة وربعين 447 مفقود. 

هادشي اللي خلا ان الجنرال شارل ديغول توج سلطان المغرب محمد الخامس بوسام تقدير كرفيق التحرير.

المساهمة الاقتصادية التي قدمها المغرب للحلفاء

النقطة الثالثة هي المساهمة الاقتصادية التي قدمها المغرب للحلفاء، حيث ان المغرب كانت عندو مساهمة اقتصادية كبيرة في الحرب العالمية الثانية، حيث انه قام بتزويد فرنسا بالمنتجات الفلاحية اللي تجلات 22.50% من الانتاج الاجمالي المغربي، وهادشي كان وسيلة لسد حاجيات فرنسا الاساسية.

كما المغاربة ساهموا ايضا ماليا حيت كانت هناك مجموعة من التبرعات لي تجمعات ولات اكثر من خمسة ملايير فرنك، هادشي عاد مزال كان الربح ديال الطوابع البريدية، والثروات المنجمية اللي تنازل عليها المغرب من اجل فرنسا، شي اللي خلا ان المغرب يعرف ازمة اقتصادية كبيرة.

نتائج المشاركة المغربية في الحرب العالمية الثانية

دابا غانشوفوا نتائج المشاركة المغربية في الحرب العالمية الثانية, غنقسموهم الى خسائر بشرية وخسائر اقتصادية.

الخسائر البشرية 

الخسائر البشرية تجلات في حوالي اكثر من الفين 2000 قتيل واكثر من طناشر الف 12000جريح وكتر من ربعمية 400 مفقود من الجنود المغاربة.

الخسائر الاقتصادية 

اما بالنسبة للخسائر الاقتصادية فكان ذلك عن طريق تضرر الاقتصاد المغربي بسبب ارتفاع الصادرات الفلاحية والمواد الاولية وارتفاع الاسعار.

مما دفع الى تقنين وتوزيع المواد الاستهلاكية اعتمادا على نظام الحصص عام البون لي معروف عندنا في المغرب.

ورغم هاد الخسائر كاملة لي عرفها المغرب غير ان المشاركة ديالو في جوار دول الحلفاء ساهمت بشكل كبير في تحرر اوروبا من سيطرة الأنظمة الديكتاتورية الفاشية والنازية، وقد وشح المغاربة بأوسمة الشرف والشجاعة، واعتبر قائد البلاد سلطان المغرب محمد الخامس آنذاك، رمز للحرية ورفيق للتحرير. 

خلاصة 

من هاد الدرس خصنا نستنتجو ان مساهمة المغرب في الحرب العالمية الثانية الى جانب الحلفاء في كانت مهمة جدا وفعالة ومهمة لنيل اوروبا النصر، وهزيمة الديكتاتوريات الفاشية الايطالية والنازية ديال المانيا، لكن هاد المساهمة خلات ان المغرب يعرف تضرر كبير في العديد من المجلات و بهذا ظل المغرب تابع لفرنسا بسبب الاستيراد وكنتمنى تكونوا ستافدتو معايا في الدرس ديال ليوما وخليو ليا الدروس لي تبغيوني نشرحهم ليكم بالتفصيل وان شاء الله غندوزو للمواد الاخرى، الله اوفق و اسهل امركم انشاء الله.