الاستغلال الإستعماري للمغرب في عهد الحماية بالدارجة درس الثانية باك pdf

السلام عليكم كي ديما عندك 3 دقايق فهم الدرس و غتلقى الدرس pdf لتحت و الله اعونك، الدرس اللي عندنا اليوم هو الاستغلال الاستعماري للمغرب في عهد الحماية فكيفما كنعرفو المغرب تستعمر من طرف فرنسا واسبانيا واستغلوه مزيان, كنا شفنا قبل بالدارجة أزمة العالم الرأسمالي الكبرى 1929 pdf، فهاد الدرس غنعرفو : فيه شناهوما الآليات ديال الاستغلال الاستعماري؟ وشناهما مظاهر الاستغلال الاستعماري في عهد الحماية؟ وشناهوما اثار الاستغلال الاستعماري؟ إذا غانبدا 

آليات الاستغلال الإستعماري 

المغرب الاستغلال الإستعماري في عهد الحماية, اولا الوسائل باش تم الاستغلال ديال المستعمر للمغرب، يعني هاد الدرس كامل غنهضرو كيفاش استغلات فرنسا واسبانيا الخيرات والثروات الكثيرة ديال المغرب. 

بالآليات المالية 

فالمستعمر اللي هو فرنسا واسبانيا غيديرو مؤسسات مالية. بحال البنك المخزني وبداو كيسلفو السكان من هاد البنك ولكن الى ردو ليهم الفلوس خصهم يردو ليهم الفلوس ومعاهم الفوائد، وشجع هاد البنك على تمويل الاستتمارات الاجنبية وفرضو على السكان المغاربة ضرائب لي صعيبة بزاف وخصهم يخلصوهم ولي مخلصهاش كيضطر انه يبيع الممتلكات ديالو.

الاليات التجهيزية

 اما الاليات التجهيزية فالمستعمر غيبني موانئ و سكك حديدية وشانطيات هادشي كامل باش يسهال عليه كيفاش ينقل الجيش ديالو ويسهال عليه كيفاش ينقل داكشي لي سرق ونهب واستغل من الدولة المغربية للبلاد ديالو يعني كان كيبني الشانطيات والسكك الحديدية باش يوصل داكشي لي استغل من البلاد ديالنا حنا للبلاد ديالو، هو ماشي بنا السكك الحديدية حبا فينا بحال دوك الناس لي كيقولو لك اه كون بقات فرنسا كن درت طرقان دارت لنا كدا الله يهديك را كان عندهم هدف علاش بناو داكشي.

الآليات العسكرية

 اما بالنسبة للآليات العسكرية فالمستعمر غيعتمد على جيش محكم ومنظم بأسلحة اللي متطورة 

الآليات البشرية

اما الآليات البشرية فراه المستعمر شجع الأوروبيين يسكنوا فالمغرب وسهل عليهم بزاف ديال الحوايج باش يستقروا فالمغرب هادشي بالنسبة للآليات ندوزو دابا لمظاهر الاستغلال الإستعماري للمغرب في عهد الحماية.

مظاهر الاستغلال الإستعماري للمغرب في عهد الحماية

بالنسبة لمظاهر للاستغلال الاستعماري للمغرب في عهد الحماية فعلى عدة مستويات غنشوفو 

على المستوى الفلاحي

بالنسبة للمستوى الفلاحي فراه المستعمر غيستحوذ على احسن الاراضي الفلاحية ولاو كيزوروا العقود ولاو كيقولوا بان دوك الاراضي راه ديالهم وخا ما ديالهمش ولاو كيخلعوا الفلاحين باش يبيعوا الاراضي ديالهم بزز منهم وفاش تباع الاراضي للمستعمر فالمستعمر غيولي يستعمل فيها احدث التقنيات واللي غتخلي المردود يكون كتير ولكن داك المردود فين كيمشي فنضرك، من طبيعة الحال كيشد طريق الفرنسا واسبانيا بطبيعة الحال يعني مكيبقاش فالمغرب ودوك السكك الحديدية والموانئ اللي كانوا قادوا من تما كانوا كينقلوا دوك المنتوجات زد عليها كانوا كيخدموا الفلاحين المغاربة بأقل ثمن هادشي غير فالميدان الفلاحي. 

على المستوى الصناعي 

اما الميدان الصناعي فالمستعمر غيستغل الثروات المعدنية ديال بصح واي منجم في المغرب كتستاغلو فرنسا واسبانيا وكلشي كيديوه لعندهم يعني تا حاجة ماكاتبقى هنايا دابا.

 اثار الاستغلال استعماري في عهد الحماية على الاقتصاد المغربي

على المستوى الفلاحي 

بالنسبة للفلاحة فأجود الأراضي حصلوا عليها المعمرين يعني الأجنبيين لي سكنوا في المغرب وتحولات الفلاحة من الفلاحة المعيشية للفلاحة التسويقية.

على المستوى الصناعي والحرفي 

بالنسبة للصناعة و الحرف فراه تضررات الصناعات والحرف اللي كيتخدمو باليد حيت المنتوجات الاوروبية دخلات للسوق المغربية وتاحد ما بقى مسوق للحرفيين أما على المستوى التجاري فراه غيرتفعو الاسعار بشكل لي كبير.

اثار الاستغلال الاستعماري على المجتمع المغربي

 اولا فئة الفلاحين فالفلاحين ما بقاوش عندهم الاراضي تحولو لعمال عند المعمرين اه البارح كانت عندهم الأرض واليوم ولاو خدامين اما فئة التجار فارتفعو الضرائب خلاو التجار يخلصو الضرائب بزاف يعني التجار المغاربة وعاد مانساوش انها كانت منافسة اجنبية في السوق المغربية, اما فئة العمال ولاو كيخدمو العمال بزاف ديال السوايع بأجور لي ضعيفة, زيد عليها بلا تأمين بلا والو.

خلاصة 

بعد هاد الإستغلال كامل مغيسكتوش عليه المغاربة او غيكافحو باش يشدو الإستقلال او دوز لدرس ديال المغرب الكفاح من اجل الإستقال واستكمال الوحدة الترابية او نتمنى انه يعجبكم او ها نتوما الله اوفق، الدرس ديال الاستغلال الاستعماري للمغرب في عهد الحماية pdf لتحت.