تلخيص المحور الثالث : الدولة بين الحق والعنف, مجزوءة السياسة - مفهوم الدولة

تلخيص محور الدولة بين الحق والعنف الثانية باك

السلام من جديد اليوم مع آخر محور فمفهوم الدولة بعد ما شفنا فالحصة لي دازت المحور الثاني : طبيعة السلطة السياسية و تلخيص المحور الأول مشروعية الدولة وغاياتها اليوم غنهدرو على محور الدولة بين الحق والعنف, اذن نتا ولا نتي ماعليك هو تقرا هادشي بشوية عليك أو مغتخرج منهنا تتكون فهمتي الدرس كامل مكمول انشاء الله.

 مقدمة المحور

محور الدولة بين الحق و العنف, الدولة كتعاني من مشكل مزدوج، فهي كتحتاج للقوة ولكن الإفراط فاستعمالها كيحولها لأداة تسلط، وكتحتاج للمرونة لكن الاقتصار عليها فقط كيحولها لسلطة من ورق. لهذا، الدولة كتجمع بين الطرفين فإطار عنف مشروع كيكتسب مشروعيته من طابعه الجزائي وحرصه على تطبيق القانون وترسيخ العدل والإنصاف.

ولكن، شنو اللي كيضمن أن الدولة تلتزم باستعمال الحد الأدنى من العنف المشروع؟ واش ما يمكنش يتحول عنف الدولة لعنف غير مشروع؟ وأخيراً، واش عنف الدولة ما غاديش يولد عنف آخر من طرف المجتمع وتنتشر ثقافة الحقد والضغينة بين أفراده؟

 مواقف وتصورات الفلاسفة حول الدولة بين الحق والعنف

 الإشكال: واش يمكن للدولة تجمع بين الحق والعنف؟ شنو الأساس اللي كتقوم عليه الدولة؟ واش الدولة كتقوم على العنف ولا الحق والقانون؟ ولا عليهم بجوج؟

 موقف فيبر (1864-1920)

فيبر كيعتقد أن الدولة كتقوم على العنف الفيزيائي.

ماكس فيبر كيقول أن العنف المادي هو الخاصية المميزة للدولة وأساس قيامها. لو كانت تجمعات بشرية ما كتمارسش العنف، كان غايختفي مفهوم الدولة وتولي الفوضى. ولكن العنف اللي كتمارسه الدولة هو عنف مشروع كيحاول إدارة التجمع السياسي والحفاظ على أمنه واستقراره. علاقة العنف بالدولة هي علاقة وثيقة بحيث أن استمرار الدولة ووجودها كيكون رهين بممارستها للعنف المشروع ضد اللي كيهددوا أمنها واستقرارها.

 موقف غاندي (1869-1948)

غاندي ضريف تيشوف أن الدولة تقوم على الحق واللاعنف.

غاندي كيعتقد أن العنف شيء سلبي وهدام، وما يصلح لبناء أي شيء. العنف كيعبّر عن إرادة سيئة ونية لإلحاق الأذى بالآخرين. بينما اللاعنف كيعبّر عن إرادة طيبة وحب شامل يهدف إلى تعميم الصداقة والمحبة في العالم. لهذا، العنف الممارس من طرف الدولة ما يمكنش يكون مشروع، فالعنف ديما كيضل عنف كيفما كانت الأسباب.

 موقف جاكلين روس (1944- )

جاكلين كتعتقد أن الدولة تقوم على الحق والقانون وفصل السلط.

جاكلين روس كتأكد أن دولة الحق ماشي غير صورة قانونية مجردة، بل كيان كيمثل عقلنة ممارسة السلطة داخل المجتمع. كتحاول توفر الحاجات الفردية وتضمن الحريات العامة وتحافظ على الكرامة الإنسانية ضد كل أشكال العنف والقوة. سلطة دولة الحق كتقوم على ثلاث أسس: القانون، الحق، وفصل السلط. هاد المرتكزات كتحاول تخدم الأفراد بتوفير الأمن، حماية الممتلكات، وضمان الحرية والاستقرار.

 موقف نيكولا ميكيافيلي (1469-1527)

حسب ميكيافيلي، الأمير أو رجل السياسة خاصو يكون واقعي وبراغماتي، ويستعمل كل الوسائل المشروعة وغير المشروعة، القانونية وغير القانونية. خاصو يكون بحال الأسد والثعلب ف نفس الوقت. يقول ميكيافيلي: "على الأمير أن يعلم جيدا كيف يتصرف، عليه أن يقلد الثعلب والأسد ف نفس الوقت، فالأسد لا يستطيع حماية نفسه من شباك الفخاخ، والثعلب غير قادر على مواجهة الذئاب." يعني خاص الأمير يجيد استعمال أسلوب الحيوان والإنسان معا. الدولة خاصها تحكم بالقانون إلى كان يخدم مصلحتها، ولكن تكون مستعدة تخرق القانون وتحكم بالعنف والقوة.

 موقف فريديك انجلز (1820-1895)

الأطروحة ديال فريدريك هي أن الدولة وسيلة تدبير الصراع ونتيجته.

انجلز كيعتبر أن الدولة كتعبر عن الصراعات بين مختلف طبقات المجتمع. الدولة ما كتنشأش باش تقضي على الصراع، بل لضمان نوع من التوازن بين الطبقات. هي تقلل من حدة الصراع ماشي تلغيه، لأنه هو الضامن لبقائها. الدولة مع انجلز ماشي أزلية، بل نتيجة مرحلة من مراحل التطور الاقتصادي.

 أمثلة من الواقع لمواقف الفلاسفة حول محور الدولة بين الحق والعنف

 أمثلة لموقف فيبر

• الدول كتفرض قوانين وتشريعات مدعومة بالقوة لضمان النظام العام، مثل قوانين مكافحة الجريمة أو قوانين السير.
• حرب سوريا مثال واضح على العنف اللي كتمارسه الدولة. النظام السوري استخدم العنف المفرط ضد شعبه، واللي تسبب فنزوح الملايين من الناس.

 أمثلة لموقف غاندي

• حركة المقاومة اللاعنفية اللي قادها غاندي ضد الاستعمار البريطاني فالهند، اللي اعتمدت على الاحتجاجات السلمية والعصيان المدني.
• نيلسون مانديلا قاد حركة مقاومة ضد نظام الفصل العنصري فجنوب إفريقيا، ورفض استخدام العنف، وركز على الاحتجاجات السلمية.

 أمثلة لموقف جاكلين روس

• وجود دساتير وقوانين تضمن حقوق الأفراد وحرياتهم، مثل دستور الولايات المتحدة الأمريكية أو الإعلان العالمي لحقوق الإنسان.
• جنوب إفريقيا بعد إسقاط نظام الفصل العنصري بنت دولة قانون تحترم حقوق جميع المواطنين.

 أمثلة لموقف نيكولا ميكيافيلي

• هتلر استخدم العنف والقوة فصعوده للسلطة ف ألمانيا.
• الولايات المتحدة وحلفاؤها شنوا حربًا على العراق عام 2003.

 أمثلة لموقف فريديك انجلز

• الصراعات الطبقية فالدول الرأسمالية بين الطبقة العاملة والطبقة الرأسمالية.
• بعض الدول كتدخل عسكريا فدول أخرى لخدمة مصالحها الاقتصادية أو السياسية.

 استنتاج عام لمحور الدولة بين الحق و العنف

دولة الحق هي دولة شرعية، لأنها مبنية على الحق والقانون وفصل السلط، وتضمن احترام الأشخاص والمواطنين. بينما دولة الاستبداد والعنف كتفقد شرعيتها منين كتستعمل العنف لفرض سلطتها وسيطرتها. ولكن بما أن الطبيعة البشرية ماشي ديما خيرة، يمكن للأفراد يلجؤوا للعنف والفوضى، والدولة كتضطر تستعمل العنف المشروع للحفاظ على النظام والأمن والسلم الاجتماعي, تال لهنا نكونو سالينا ملخص محور الدولة بين الحق و العنف, كنتما ليكم النجاح و التوفيق انشاء الله ويلا عندك شي ملاحظة أو غموض ماعليك الا دير شي تعليق و غنجاوب على كلشي انشاء نتشاوفو فدرس آخر باي