محور المعرفة التاريخية بالدارجة

تلخيص درس المعرفة التاريخية بالدارجة 

السلام عليكم أو مرحبا بكم في درس جديد من منصة كلشي بالدارجة مع مادة الفلسفة، إذا من بعد ما ختمنا مفهوم الغير و قرينا ملخص العلاقة مع الغير، فاليوم ان شاء الله فهاد المقال البسيط غادي نتكلمو على المفهوم الثالث من مفاهيم مجزوءة الوضع البشري ولي خاص بالادبيين و هو مفهوم التاريخ، كي ديما خود 3 دقايق قرا هادشي بشوية عليك او غتخرج فاهم تلخيص محور المعرفة التاريخية بالدارجة ساهل ماهل.

المعرفة التاريخية تقديم

عرفتي ملي كندويو على التاريخ كندويو على الماضي ديال الانسان، الماضي ديالي وديالك والماضي ديال البشرية كلها، الا كنا قلنا بلي فهم الانسان لراسو متوقف على فهم الناس لي معاه بطبيعة الحال سيكون فهمه لنفسه متوقف ايضا على فهم التاريخ ديال الاسلاف ديالو، وكيفاش اصلاً ولات هاد الحياة بحال هاكا وتكونات الأفكار ديالها، ايوا اسيدي بإختصار الى فهمتي التاريخ ديالك مزيان غادي تفهم الحاضر وغادي تقدر تنبأ بالمستقبل, حيت سنن الله الكونية ديما كتعاود، كيف كنقولو الخير كيغلب الشر راه بحال هكاك بزاف ديال اللعيبات لي كيطراو فالتاريخ اكيبقاو يتعاودو غا بنادم لي مكلخ، و هادشي لي غنشوفو في درس محور المعرفة التاريخية.

 ايوا هادي دعوة من الفلسفة الى الإهتمام بالتاريخ, و ناقشوا الفلاسفة بالزاف ديال المواضيع فهاد المفهوم على شكل محاور، المحور اللول هو هل المعرفة التاريخية ممكنة؟ زعما واش اصلا ممكن باش تعرف التاريخ اللي هو بعيد عليك؟ (وهادشي لي غادي نشرحوه) واش ممكن اصلا؟ وكيف تتحدث سيرورة التاريخ؟ واش التاريخ كيبقى غادي شي مجتمع كيتطور كيتطور... هادشي كيولي مزيان، اولا القضية فيها غموض اي محور التاريخ و فكرة التقدم، واخر محور عالجوه الفلاسفة هو مدى مساهمة الإنسان فصناعة التاريخ، واش دابا حنا ملي كتقول فلان صنع التاريخ، واش هو بصح صنع التاريخ، اولا داكشي لي غادي بيه التاريخ وقع وحدت صدفة ان كان ذلك الشخص هو الذي فعل ذلك الشيء.

سمحوليا عارف راسي تلفتكم في هاد النقطة ولكن المحور الثالث ان شاء الله غادي نغيزوها ما تخافوش. 

سيداتي سادتي (او اسيادي سادتي او معرفتش شنو) مرحبا بكم في اول محور المعرفة التاريخية. كي ديما ا سيدي اول حاجة كنديروه ديما في كل درس طرح الإشكالات. 

المحور الأول: المعرفة التاريخية

طرح الإشكالات

شنو هو التاريخ؟ واش معرفة التاريخ ممكنة ولا مستحيلة؟ واش يمكن نعرفو التاريخ معرفة علمية قائمة على المنهج ولا المعرفة التاريخية غير معرفة سردية وأدبية كتعتمد على الخيال؟ حنا فهاد الدرس غندكرو غي جوج فلاسفة أغنياء عن التعريف.

ابن خلدون: التاريخ معرفة علمية

ابن خلدون كيميز بين المعرفة التاريخية العامية (ظاهر التاريخ) المرتبطة بالحس المشترك؛ وهي معرفة يومية وذاتية كتختلف بتعدد الذوات، حيث أنها غير آراء مشتركة بين الناس كتنقل من جيل لجيل من خلال السرد والحكي، لذلك فهي معرفة مختلطة بالأوهام والظنون. وبين المعرفة التاريخية العلمية (الموضوعية) بوصفها نظرا عقليا في أحوال اللي عاشوا في الماضي، وتحليلا لأفعالهم وحوادثهم عن طريق استعمال معياري العقل والحكمة (باطن التاريخ). هاد المعرفة كاتجمع بين البناء العقلي الممنهج وبين التحقيق والتدوين، لذلك فهي معرفة رصينة بالأحداث التاريخية اللي كيخدم المؤرخ على تفسيرها بالرجوع لأسبابها الموضوعية باش يحافظ على خصوصية الظاهرة التاريخية.

غاستون غرانجي: التاريخ ليس معرفة علمية

الإبيستيمولوجي المعاصر جيل غاستون غرانجي كيعارض كل التصورات اللي كتقول بعلمية المعرفة التاريخية وكيوكد في المقابل على أطروحة مفادها أن التاريخ ماشي واحد من العلوم الإنسانية، لذلك ما خاصش نخلطو بينه وبين علم الاجتماع، علم النفس، الاقتصاد…، إذ من الممكن للمؤرخ يستند في دراسته على كل هاد العلوم بلا ما يكون ملزم بصياغة معرفته انطلاقا من تبني أطروحات أحد العلوم السالفة. هاد الوضع حسب جيل غاستون غرانجي كيخلي من التاريخ تخصص فريد، لأن التاريخ (في نظره) ما كيهموش صياغة نماذج خاصة بالظواهر كما هو الشأن بالنسبة للعلوم الأخرى، لأنه كيطمح لإعادة بناء الوقائع اللي وقعات في الماضي. لذلك، التاريخ حسب غرانجي ماشي علم، بل هو واحد من الفنون المتأرجحة بين الرواية والعلوم الاجتماعية، فمن خلال نزوعه الجمالي كيقترب التاريخ من الرواية، ومن خلال بعده الصوري كيقترب من العلوم الاجتماعية، كما أنه ما كيخضعش لشروط ومبادئ المعرفة العلمية الفيزيائية ما دام ما كيقبلش التكرار وما كيعتامدش على منهج تجريبي واضح، وهاد الشي اللي كيحوله لإيديولوجيا رغم بعض المطامح اللي كتحاول تنزع به نحو الموضوعية.

خلاصة درس المعرفة التاريخية 

يمكن نقولو أن المعرفة التاريخية كتاخد أبعاد متعددة؛ منها ما هو أسطوري خيالي مرتبط بالحكايات والخرافات، ومنها ما هو أدبي سردي متعلق بالرواية ومنها ما هو علمي كيلقى تجسيده في العلوم الإنسانية كالأنثروبولوجيا والسوسيولوجيا واللسانيات…

مغاديش نطول اكتفي بما قلت كي اسعفكم بإذن الله فيما يتعلق بالامتحان الوطني والا فالموضوع جميل ويحتاج الى مزيد من البحث والكلام متنساوش ديرو اعجاب وتعليق باش يطلع المحتوى لناس وحداخرين كان معكم سهاد الموح والسلام عليكم ورحمة الله