تقديم مجزوءة السياسة بالدارجة

مقدمة إلى مجزوءة السياسة بالدارجة 

السلام عليكم الاخوان سمحو ليا تعطلت عليكم هاد المرة لأسباب خاصة، إذن منبعد ما سالينا مجزوءة المعرفة فآخر محور لي هو تلخيص محور نموذجية العلوم التجريبية بالدارجة. اليوم غندوزو لمجزوءة السياسة لي هي وسيلة من وسائل تنظيم المجتمعات البشرية، باش نحافظو على الاستقرار والأمن، ونسهلو بقاء البشر. بمعنى آخر، السياسة هي تنظيم المجتمعات الإنسانية، وهادشي باين من أصل الكلمة ومعناها. السياسة Politic جات من الكلمة اليونانية polis اللي تعني المدينة، وهنا كتدل على الكيان الاجتماعي المنظم اللي كيشتغل أعضاءه باش يحققوا الاكتفاء الذاتي. هاد الأعضاء خاصهم يبنيو علاقاتهم على فضيلة العدالة، ويديرو حياتهم لتحقيق الخير الأسمى والسعادة الكاملة. وحتى فالمعنى العربي، السياسة جاية من فعل ساس يسوس، كيقولوا سوَّسَهُ القوم: جعلوه يسوسهم. وكيقولوا: سوِسَ فلان أمر بني فلان، يعني كلفوه سياستهم. وسوِسَ الرجل أمور الناس، يعني تولى أمرهم. وبهذا المعنى، السياسة كتدل على تدبير الشأن العام.

اسباب دراسة مجزوءة السياسة 

أسباب الحاجة الملحة للسياسة هي تضارب آراء الناس وتداخل مصالحهم. كلنا عارفين أن الإنسان كيحب التملك والسيطرة، وكل واحد عندو رأيه الخاص وميولاته. هاد التداخل فالآراء والمصالح كيمكن يسبب النزاع والعنف. لذلك كان ضروري تنظيم المجتمع بنظام عقلاني يسمح بتدبير هاد التداخلات والنزاعات، وهنا جات السياسة كتدبير عقلاني للاختلاف بين الناس.

محاور مجزوءة السياسة 

ولكن السياسة خاصها أجهزة باش تدبر الشأن العام، وهما اللي كنسميوهم الأجهزة السياسية. واحد من أبرز هاد الأجهزة هو الدولة. الدولة كتعتبر وسيلة لتدبير الشأن العام عبر مجموعة من الآليات والمؤسسات. وما يمكنش نهضرو على الدولة بلا ما نتكلمو على العنف كآلية رافقت العملية السياسية، سواء كوسيلة للتدبير أو كظاهرة لازمات التاريخ الإنساني. بالإضافة لهذا، الحديث عن السياسة ما كيكملش بلا ما نتكلمو على مفهومين آخرين مرتبطين بالممارسة السياسية، وهما الحق والعدالة. السياسة ما كتنفعش إلا إذا كانت عادلة، والسياسة العادلة هي اللي كتأخذ بعين الاعتبار حقوق الأفراد.

خلاصة 

هذا كيخلينا نتساءلو: كيفاش كيتدبر الشأن العام؟ واش السياسة كتتم عبر مبدأ الحق والقانون والعدالة ولا عبر مبدأ العنف والقوة؟

هنا تنكونو سالينا التقديم دوز لتلاخيص الدروس باش تفهم مجزوءة السياسة و محاور مجزوءة السياسة كاملة أو عطي شويا ديال الوقت لراسك أو متخافش الباك فالجيب انشاء الله، الا وصلتي لهنا خلي شي انطباع أو تعليق نعرفو رأيك حول تلخيص الدرس، الله يوفقك و باي.