تلخيص الفصل الثالث من ظاهرة الشعر الحديث تجربة الحياة والموت بالدارجة
تلخيص الفصل الثالث من ظاهرة الشعر الحديث تجربة الحياة والموت بالدارجة عام, بعد النكبة ديال فلسطين غيوقعو شي حوايج لي غتخلي انه الشاعر ينتقل من الموت للحياة، ايلا لاحظتو العنوان تجربة الحياة والموت
السلام عليكم ورحمة الله فالمقال اللي قبل كنت درتلكم تلخيص الفصل الأول من مؤلف ظاهرة الشعر الحديث وبعدها درت لكم تلخيص الفصل الثاني بعنوان تجربة الغربة و الضياع او فهاد المقالة هادي غادي نديرو الفصل الثالث من ظاهرة الشعر الحديث بعنوان تجربة الموت و الحياة، على بركة الله نبدأ.
الفصل الثالث تحت عنوان تجربة الحياة والموت
اول حاجة غيتطرق ليها الناقد احمد المعداوي المجاطي هي واحد الإشارة لواقع العالم العربي في القرن 20 او بالضبط بعد 20 سنة مور النكبة ديال فلسطين لي وقعت في 1948، يعني مور عشرين عام بعد النكبة ديال فلسطين غيوقعو شي حوايج لي غيخلي انه الشاعر ينتقل من الموت للحياة، ايلا لاحظتو العنوان تجربة الحياة والموت يعني غينتاقل من الموت للحياة وشنو كنقصدو هنايا بالموت والحياة؟ كنقصدو انه النفسية ديال الشاعر لي كانت ميتة غتولي حية، أو عدنا 4 دالحوايج هاد الربعة هادو بالضبط هوما اللي خلاو انه شاعر ينتقل من الموت للحياة اللي هوما : ثورة مصر، مرورا بتأميم قناة السويس و رد العدوان الثلاثي، استقلال اقطار العالم العربي، هاد الرابعة دالحوايج هما لي خلاو الشاعر ينتقل من الموت للحياة، يعني الثورة دمصر اللي سقط فيها النظام الملكي و تحول للنظام الجمهوري، بعدها تأميم قناة السويس اي انهم ردو قناة السويس من يد الانجليز لمصر و رد العدوان الثلاثي واستقلال اقطار العالم العربي، يعني العرب ولاو كيستقلو دولة بعد دولة، اذا هاد الربعة د الحوايج اللي وقعو خلاو انه الشاعر النفسية ديالو تنتقل من الموت للحياة.
اذا من بعد هاد الربعة ديال الأحداث تخلق لينا جوج ديال الإتجاهات في الشعر العربي، لي هما اتجاه اليأس لي كنا هضرنا فيه في الفصل التاني ديال تجربة الغربة والضياع والاتجاه الثاني لي غنهضرو فيه فهاد الفصل لي هو اتجاه الأمل، ومورا هادشي هدا بالضبط غيولي الشاعر كيستعمل الاساطير باش يخلي النفسية ديال المتلقي يكون فيها الأمل، كمثال ملي نتا ملي كتقول لخوك الصغير بأنه بطل خارق او كدا كتخلي فالنفسية ديالو واحد الأمل (انا عارفك كدير هكا غي باش تسخرو للحانوت) المهم راك فاهم المقصود الشاعر كيستعمل الأساطير فالشعر ديالو او كيزرع الأمل فالمتلقي، يعني 4 دالحوايج لي خلاو الشاعر ينتقل من الموت للحياة زائد انه الشاعر ولا كيستعمل الاساطير هادا هو الجزء الأول (راه ساهلة للحفظ الا مفهمتيش شي حاجة سولني فتعليق).
دابا عوتاني عندنا ربعة ديال الحوايج مهمة اللي هي طريقة الانتقال من الموت للحياة بالنسبة لاربعة شعراء، بالنسبة لأدونيس و خليل الحاوي وعبد الوهاب البياتي بدر شاكر السياب، وغالبا الى كان غيتحط الامتحان فهاد الفصل هدا غيعطيوك اسئلة على هاد الربعة هادو غيقولك متلا شناهي طريقة الانتقال من الموت للحياة بالنسبة لأدونيس ولا لخليل الحاوي ولا عبد الوهاب البياتي ولا بدر شاكر السياب، راه ساهلة شوف كل شاعر ضبط فيه جوج د النقط مهمة لي هي شناهو طريقة الانتقال من الموت للحياة عندو؟ وشناهي الاسطورة لي استعمل؟ ما عمرك انك تزكل هاد الجوج فهاد فهاد الربعة ديال الشعراء نبداو بادونيس.
انتقال الشاعر ادونيس من الموت للحياة
طريقة الانتقال
قالك انطلاق هاده التجربة من ذاته المحتقنة بفحولة التاريخ العربي والاعتزاز بالحضارة العربية في الماضي وفي واقع اليوم الذي يفتقر الى الفحولة والهزيمة والنكسة والاستعمار، شوف ها هي النقطة اللولانية خصها هادي تحفظ 100%, اول حاجة كيبدا بيها ادونيس هو انه كيفتاخر بالعرض ديال الماضي يعني هانتا منين ذاته المحتقنة للفحولات في التاريخ العربي في الماضي، اي انه كيفتاخر بالعرب ديال شحال هادي كانوا مجهدين كانوا هوما اللي كيديرو فتوحات ماشي الواقع العربي ديال اليوم اللي كاملين مستعمرين يعني هادي اول نقطة قالها ادونيس خصها دخل للدماغ، تاني حاجة عند هو انه هو عندو جوج دالاتجاهات واحد الاتجاه كيقلب على الحل و الوسيلة باش انه ينتقل من الموت للحياة، هادا اول اتجاه سول عليه والاتجاه الثاني هو انه غيكتشف الحل اللي هو : مفهوم التحول اي موت واقع الأمة المتخلف، وحياة واقع التقدم والإزدهار هادشي اللي ينبغي عليك تحفظو، يعني اول حاجة كيعتز بالعرب شحال هادي عكس ديال دابا، عندو جوج اتجاهات اتجاه كيقلب على الحل واتجاه لقى الحل لي هو التحول ولي هو موت واقع الأمة المتخلف وحياة التقدم والازدهار.
الاسطورة المستعملة في شعره
دابا شناهي الأسطورة لي كيستعملها ادونيس؟ هي اسطورة تيمور ومهيار حيت مهيار هو رمز للشعب وتيمور هو رمز للإستعباد والقهر صافي هادشي لي تحفظ فأدونيس.
انتقال الشاعر خليل الحاوي من الموت للحياة
بالنسبة لخليل الحاوي هو مبدأ المعاناة، خصك تعاني وبالنسبة للأسطورة لي استعمل هو تموز والعنقاء.
يعني ساهلة خاصك انك كل شاعر تعرف كيفاش الانتقال من الموت للحياة بالنسبة ليه وشناهو الأسطورة لي استعمل؟. الا مفهمتيش شي نقطة حط كمنت نفهمها ليك مرحبا. ندوزو عند الشاعر الثالث عندنا.
انتقال بدر شاكر السياب و عبد الوهاب البياتي من الموت للحياة
بالنسبة لبدر شاكر السياب هو خدا الفداء يعني التضحيات اي الحل هو انك خاصك ضحي باش تنتقل من الموت للحياة، وبالنسبة للأسطورة لي استعمل هو المسيح عيسى عليه السلام بعد الصلب.
اما بالنسبة لعبد الوهاب البياتي فهو جدلية الأمل واليأس يعني الصراع اللي ما بين الأمل واليأس اللي فيه تلاتة دالمنحنيات منحنى الأمل ومنحنى الإنتظار ومنحنى الشك. دابا غندوزو للعوامل اللي خلات ان تجربة الشعر الحديث هادا ماتوصلش للجمهور.
العوامل المسبب في منع وصول هذه التجربة للجمهور
العامل الديني القومي.
العامل الديني القومي هو انه الناس خافوا انه هادوك الناس اللي بدلوا الشعر ديال شحال هادي (إحياء النموذج) يقدرو انهم يمسو تا بالمقدسات الدينية على القرآن... الى اخره.
العامل التقافي
هو انه الناس قتانعو بأنه ماكاينش شي حاجة حسن من الشعر التقليدي
والعامل السياسي
بما انه هاد تكسير بنية ولا هاد الشعر الحديت، ولا كيعطي للشاعر الحرية يكتب كيفما بغا، خافو انه يكتب فمضامين سياسية.
العامل التقني
هو انه ولاو الناس كيشوفو انه كيستعمل الاساطير والخيال وهادي ماشي شي حاجة اللي تقدر انها توصل المضامين الثورية اي انهت تكون في الثورات الى آخره.
خاتمة
اذا هادي هي الخلاصة ديال الفصل الثالث شنو خاصك تضبط فيها؟ انا نعاود عامة اول حاجة عندك شفنا شناهوما العوامل اللي خلات انه الشاعر ينتقل من الموت للحياة، اللي هوما ثورة مصر تأميم قناة السويس رد العدوان الثلاثي واستقلال اقطار العالم العربي، وموراها شفنا شناهو الحل باش تنتقل من الموت للحياة بالنسبة للربعة ديال الشعراء هم اللي شفنا دابا هادشي اللي خاصك تضبط فهاد الفصل هادا ونتمنى نكون قد سهلت هاد الفصل هادا وبالتوفيق ان شاء الله، نعاود نكرر الا جاتك شي حاجة صعيبة اولا غامضة حطها فتعليق.
ما هو رد فعلك؟
