حركة سؤال الذات بالدارجة

تيار سؤال الذات الثانية باك 

السلام نتمنى تكونوا بخير ونتمنى تكونوا في احسن الأحوال في الحصة اللي قبل كنا شفنا تجربة احياء النموذج وشرحناها وفهمنا أو عرفنا كيفاش تيتم احياء الشعر فبالتالي فهاد المقال هادا غاتكون الحصة الثانية اللي غادي نشرحوا فيها حركة سؤال الذات يعني كيما العادة خود ليك 6 دقايق قرا هادشي بالشوية عليك او غتخرج فاهم انشاء الله مغتلقاش المشكل, اذن نتا كتلميذ ملي كتسمع سؤال الذات كتسول راسك بعض الأسئلة منها :

• شنو المعنى ديال سؤال الذات؟
• او علاش بالضبط جات هاد الحركة ديال سؤال الذات مور احياء النموذج؟
• شنو هما الخصائص ديال سؤال الذات؟

تعريف حركة سؤال الذات 

دابا ركز معايا مزيان وحل معايا دماغك أو ركز معايا مزيان الله يسهل عليك, منين جات احياء النموذج أو البعث و الاحياء موراها تيار سؤال الذات ركز معايا مزيان هاد سؤال الذات اعادت الاعتبار لهموم الشاعر, حنا كنعرفو بأن احياء النموذج كانت عندها مواضيع تقليدية كتهضر متلا في المدح كتمدح شي واحد، الوصف كتوصف، الغزل الى اخره... فبالتالي المواضيع لي كانوا كيهضرو عليها القدماء هي مواضيع تقليدية.

جات هاد سؤال الذات اعادت الاعتبار لهموم الشاعر يعني اعادة اعتبار لذات الشاعر اي الشاعر بامكانو انه يعبر على الاحاسيس ديالو وعالهموم ديالو فيمكن لو يهضر فمواضيع عندها علاقة بالحب عندها علاقة بالحزن عندها علاقة بالمأساة عندها علاقة بالفرح يعني اي حاجة عندها علاقة بذات شاعر داكشي علاش سميناها سؤال الذات لاحظتي دابا كيفاش توضحات لك الرؤية يعني احياء النموذج كانت عندهم واحد المواضيع تقليدية لكن جات سؤال الذات لي كيما تنقولو حنا اعادت الاعتبار لهموم الشاعر يعني الشاعر كان مقيد من طرف النقاد واللغويين اي مكانش بامكانو انه يكتب فمواضيع عندها علاقة بداتو كشاعر لكن جاتها الحركة ديال سؤال الذات فأعادت الاعتبار للهموم ديالو أو عطاتو الحق انه يكتب في مواضيع اللي عندها علاقة بدات الشاعر وكاع داكشي اللي كيحس به يكتب فيه.

داكشي علاش سمينا تيار سؤال الذات تال لهنا مزيان فوقاش بانت هاد الحركة ديال سؤال الذات؟ هاد الحركة ديال سؤال الذات بانت في الف وتسعمية وواحد وعشرين 1921 من طبيعة الحال منين صدر كتاب الديوان للعقاد يعني هاد العقاد من الرواد ديال حركة السؤال الذات ولي شاركوا معاه كنقصد المازني الى اخره فبالتالي هاد الحركة ديال السؤال الذات الهدف ديالها هو انها تعيد الاعتبار الهموم انا شتوني ديما كنعاود هاد اعادة الاعتبار وخصكم تحفظوها لان هي كيما كنقولو داك التعريف الرئيسي ديال حركة السؤال الذات.

عوامل ظهور حركة سؤال الذات

دابا غادي تقول ليا علاش بانت هاد الحركة ديال سؤال الذات؟ يعني شناهي العوامل اللي خلات ولا الاسباب اللي خلات هاد الحركة ديال سؤال الذات؟ عندنا مجموعة ديال العوامل اللي حاولت انني نلخصهم يعني ما نخليش بزاف مني نعطيك غي ثلاثة دالعوامل:

1. اول حاجة الاستعمار الاوروبي و الحرب العالمية الاولى يعني المخلفات ديالها اي التهميش والضياع اللي خلات هاد الشاعر انه يولي يكتب او يبغي انه يكتب على الاحاسيس ديالو
2. تاني حاجة التلاقح الفكري ما بين الحضارة الغربية والحضارة العربية
3. واخر حاجة تأثر الرومانسيين العرب بالرومانسيين الاجانب

فبالتالي هادو اهم العوامل او الاسباب لي خلات هاد الحركة تبان تال لهنا مزيان، هاد مدرسة سؤال الذات كتنقسم لثلاث المدارس او جماعات

مدارس حركة سؤال الذات

حركة سؤال الذات كتقسم لثلاث مدارس رئيسية:

1. مدرسة الديوان: مثلها عباس محمود العقاد، وإبراهيم عبد القادر المازني، وعبد الرحمان شكري.
2. الرابطة القلمية: تشكلت في المهجر الأمريكي، وزعمها جبران خليل جبران، وميخائيل نعيمة، وإيليا أبو ماضي.
3. مدرسة أبولو: أسسها أحمد زكي أبو شادي، وانتهى إليها إبراهيم ناجي، وعلي محمود طه، وأبو القاسم الشابي.

خصائص سؤال الذات

• اللغة: لغة سهلة وقريبة للحديث اليومي، عكس لغة إحياء النموذج اللي كانت تتميز بالفصاحة والجزالة.
• المواضيع: مواضيع تعبر عن الذات والأحاسيس الشخصية للشاعر.
• الصورة الشعرية: تعتمد على الخيال والتأمل الفلسفي.

هاد الحركة كانت مهمة لأنها سمحت للشعراء بالتعبير عن مشاعرهم وأفكارهم بحرية، وخلقت نوع جديد من الشعر اللي كيركز على الذات والوجدان.

خاتمة ملخص حركة سؤال الذات 

مدرسة السؤال الذات كخلاصة كنا هدرنا فهاد المقال اللي قصير على شنو المعنى ديال حركة السؤال الذات, و خصائص حركة سؤال الذات, عوامل ظهور حركة سؤال الذات, و المدارس ديال حركة سؤال الذات يعني الأمور ساهلة, ان شاء الله فالدرس القادم غادي نحاول ندير تكسير البنية ونهضر عليها ونشرحها وبالتالي غنحاول ندير درس كل نهار فما بقى لي غي نودعكم ونضربلكم موعد فالحصة الجاية وبالتوفيق والنجاح ليكم ان شاء الله.