تلخيص مفهوم الواجب مجزوءة الأخلاق، المقدمة
بنفس نهج الدرس السابق مجزوءة الأخلاق بالدارجة: الواجب والحرية والسعادة, لي كان بمثابة مدخل لهاد المجزوءة و كنا هضرنا على مفهوم الواجب في مجزوءة الأخلاق بشكل ملخص و قلنا بلي كتير من المرات كيلقى الواحد راسو مجبور يدير حوايج معينة، حتى واخا تكون ضد ما كيحس بيه وضد رغباتو الخاصة. وغالبا بعض المواقف ديال الحياة مع الناس كتخليه يتخلى على حقوقو الخاصة وذلك باش يوفي بالواجب الأخلاقي اللي كيكون موجود في جميع القيم، وكيعطيها طابع الضرورة والإلزام.
غير أن هاد الواجب كيطرح مسائل فلسفية صعيبة، حيث كيبدا في بعض الأحيان بحال إكراه مفروض علينا بالقوة، وفي أحيان أخرى كيبدا بحال إرادة حرة كتعبر على راسها بشكل تلقائي. زيد على هاد، أسس الوعي الأخلاقي متعددة، بين الأساس الشخصي اللي هو الأحاسيس والمشاعر الفطرية، والأساس الخارجي اللي كيرجع للمجتمع. وهاد الشي هو اللي خلانا نطرحو الأسئلة الجاية:
- أشنو هي مظاهر وتجليات الواجب؟
- منين كيجي الوعي الأخلاقي؟
- أشنو هي العلاقة بين الواجب والمجتمع؟
المحور الأول: الواجب والإكراه
الواجب بحالو أمر أخلاقي
الإرادة ما كتطيعش دايما أوامر العقل، هكذا كيشوف الفيلسوف إيمانويل كانط، وعلاش هكذا؟ لأن العقل كيمارس عليها نوع من الإكراه، وهاد الإكراه هو اللي سماه "الأمر الأخلاقي". وهاد الأخير عندو جوج أنواع:
- الأوامر الأخلاقية الشرطية: وهي اللي كتعبر على الضرورات العملية ديال بعض الأفعال، ما كنشوفوهاش في حد ذاتها، ولكن من خلال نتائجها. يعني هي وسائل باش نوصلو لأهداف معينة.
- الأوامر الأخلاقية القطعية: وهي اللي كنشوفوها بحالها غاية في حد ذاتها. وهي واضحة بديهية لدرجة أن الإرادة كتعرف من تلقاء نفسها باش تخضع ليها، وهاد الأوامر عندها طابع كوني وشامل لجميع البشر.
الواجب بحالو إحساس بقدرة
جون ماري غويو كيشوف شي مختلف، فعندو الواجب ما هوش إكراه، بل هو إحساس داخلي بقدرة خاصة تتميز على باقي القدرات. يعني ملي كيحس الواحد من داخلو بأنو قادر يدير شي عظيم، هاد الإحساس هو أول خطوة نحو ما خاصو يدير.
الواجب إذن هو فيض من الحياة باغي يتدفق، الناس ظنو أنو هو إحساس بضرورة أو ضغط، غير أنو في حقيقتو ما هو غير إحساس بقدرة. كل قوة متجمعة كتولد نوع من الضغط على العوائق اللي قدامها، وكل قدرة كتنتج واجب متناسب معاها. ومستحيل على شخص يوصل لغايتو إلا إذا كانت عندو قدرة تتجاوز تلك الغاية ذاتها. الواجب الأخلاقي إذن حسب هاد النظرة الطبيعية، كيرجع للقانون الطبيعي الشامل: الحياة ما تقدرش تبقى بدون ما تنتشر.
المحور الثاني: الوعي الأخلاقي
الوعي الأخلاقي فطري
روسو كيقول بأنو في عمق النفوس البشرية كاين مبدأ فطري ديال العدل والفضيلة، وعليه كنبنيو أحكامنا على أفعالنا وأفعال الآخرين، فنقولو هاد الشي مزيان وهاد الشي خايب. وهاد المبدأ هو اللي سماه "الوعي".
الوعي هاد مكون من أحاسيس فطرية منها: حب الذات، الخوف من الألم والموت، والرغبة في العيش بسعادة. غير أنو الإنسان كائن اجتماعي بطبعو، فظهرات أحاسيس فطرية أخرى في علاقتو مع الناس. وهنا كيولد دافع الوعي من المنظومة الأخلاقية.
وعند روسو فرق بين معرفة الخير ومحبتو: الإنسان ما عندوش معرفة فطرية، ولكن ملي كيفهم الخير بعقلو، وعيه كيحملو على حب هاد الخير تلقائيا، وهاد الإحساس هو وحدو اللي فطري.
الوعي الأخلاقي وقانون الإلزام
نيتشه كيشرح الأمر من زاوية مختلفة، إذ كيقول بأن المدين باش يعطي مصداقية لوعدو بالتسديد ويرسخ في ضميرو ضرورة الوفاء بهاد الواجب، كيلتزم للدائن بموجب عقد، أنو في حالة ما سددش، غادي يعوضو بشي آخر مما يملكو، كجسمو أو زوجتو أو حريتو أو حتى حياتو.
وبفضل هاد "العقاب الموجه" للمدين، كيحصل الدائن على إحساس بالكرامة والقدرة على احتقار واحد أدنى منو. وفي هاد الإطار ديال قانون الإلزام، كيشوف نيتشه أصل التصورات الأخلاقية كلها: "الخطأ"، "الضمير"، "الواجب"، "قدسية الواجب". وبحال كل شي عظيم فوق هاد الأرض، روّتو دماء كثيرة على مدار زمن طويل.
المحور الثالث: الواجب والمجتمع
الواجب هو سلطة المجتمع
إميل دوركايم كيرى بأن المجتمع هو اللي زرع فينا حين عمل على تكويننا خلقيا، تلك المشاعر اللي كتمليلنا سلوكنا بنبرة آمرة وصارمة، أو كتثور علينا بهاد القوة ملا رفضنا نخضعو لأوامرها. ضميرنا الأخلاقي ما خرجش غير من المجتمع وما كيعبرش غير عنو. وملا كيهضر ضميرنا، فهو كيردد صوت المجتمع فينا. والنبرة اللي كيهضر بيها هي أكبر دليل على السلطة الهائلة اللي عندو.
الواجب بحالو انفتاح على الإنسانية
هنري برغسون كيقول بأن المجتمع هو اللي كيرسم للفرد مناهج حياتو اليومية، فكيخضع لأوامره وكيتبع واجبات متوافقة مع قوانينو، وغالبا ما كنحسوش بما كنديرو ولا كنبذلوش جهد في ذلك، لأن المجتمع هو اللي رسم لينا الطريق ومحتاجين غير نتبعو.
حتى يمكن القول بأن الخضوع للواجب في معظم الحالات، هو أن يرخي الإنسان زمام نفسو ويستسلم. غير أن هاد المجتمع كيقود لأخلاق منغلقة، ولهاد الأمر دعا برغسون لتبني الأخلاق المنفتحة من خلال الارتباط بالمجتمع المفتوح اللي هو الإنسانية بكاملها، يعني واجبات الإنسان نحو الإنسان كاحترام حياة الآخرين وحقهم في التملك.
استنتاجات عامة
اللي كيميز الواجب الأخلاقي عن الواجبات القانونية، هو أن هاد الأخيرة مفروضة على الفرد من خارج ذاتو وكتتميز بالإكراه، في حين أن الواجب الأخلاقي خارج من إرادة الفرد واختياره الحر.
القيم الأخلاقية وإن بدات مثل عليا وسامية كيطلبها الإنسان ويسعى إليها، غير أن التاريخ كيحكيلنا بأن عملية نشرها وتطبيقها على أرض الواقع خلفات وراءها جرائم وفضاعات كثيرة كالحروب والإعدامات والعقوبات الوحشية.
الواجب الأخلاقي وإن كان يبدا خارج من الداخل، فأصلو هو المجتمع، اللي كتتسرب قيمو الأخلاقية لداخل الشخصية الإنسانية عبر التنشئة الاجتماعية يعني التربية. وهاد الشي هو اللي سماه سيغموند فرويد "الأنا الأعلى"، وهو واحد من مكونات الجهاز النفسي للشخصية
اترك تعليقاً
لن يتم نشر عنوان بريدك الإلكتروني. الحقول المطلوبة مشار إليها بـ *
