تلخيص الفصل الأول لمؤلف ظاهرة الشعر الحديث بالدارجة, التطور التدريجي للشعر العربي الحديث

السلام عليكم الإخوان كنتمنى لكم دائما تكونو بخير وفي افضل الأحوال, كي ديما خود ليك 6 دقايق قرا هادشي بالشوية عليك او غتخرج فاهم انشاء الله مغتلقاش المشكل اذا مرحبا بكم في درس جديد ظاهرة الشعر الحديث المؤلف النقدي لي عندكم فالبروغرام ديال ثانية باك في الدورة الأولى لصاحبه احمد المجاطي فهاد الكتاب احمد المعداوي المجاطي كيدرس الظاهرة الشعرية الحديثة أو الشعر الحديث او ما يعرف اولا بشعر التفعيلة او الشعر الحر وكلها مسميات ديال نفس الاتجاه الشعري في اطار تاريخي مضبوط وحاسم من نكبة فلسطين الف وتسعمية وتمنية وربعين 1948 وصولا الى النكسة العربية الكبرى أي الهزيمة ديال الف وتسعمية وسبعة وستين 1967 بعد هزيمة الجيوش العربية امام الكيان الاسرائيلي.

(في حالة كنتي مهتم المنصة ديالنا كتعطيك فرصة انك تقرا و تعلم و تخدم فنفس الوقت من خلال انك تسجل فالمنصة و تكتب ملخصات بالدارجة لدروس قريتيها و فهمتيها و غتخلص على حساب عدد القراء لي قراو المقال ديالك، تقدر تسجل من هنا)

هاد الكتاب كيتألف من ربعة ديال الفصول غنخصصو لكل فصل مقال خاص به باش ناقشو افكارو وقضاياه نبداو على بركة الله. 

الفصل الأول بعنوان التطور التدريجي للشعر العربي الحديث

الفصل الاول لي هو التطور التدريجي للشعر العربي الحديث كينقسم الى قسمين القسم الأول نحو مضمون ذاتي القسم الثاني نحو شكل جديد نوقفو اولا في القسم الأول.

نحو مضمون ذاتي 

هادي أنا براسي كان عندي فيها مشكل كيفاش نحو مضمون ذاتي اوا اسيدي هي بكل بساطة "التطور التدريجي للشعر العربي الحديث نحو مضمون ذاتي" اي الذات ديال الكاتب أو الشاعر كمل باش تفهم، كينطلق احمد المعداوي المجاطي من مبدأ اساسي كيآمن بيه مفاده ان كل تطور في الشعر العربي منذ فجر التاريخ كان رهين بمحركين الحرية والاحتكاك بالثقافات الاجنبية، ضروري خاص الشاعر يكون كيتوفر على هاد الشرطين باش يقدر انه يزيد بالقصيدة ديالو نحو الامام فنّيا وموضوعيا وكيعطينا دليل من العصر العباسي بنماذج بحال ابو نواس وابو تمّام لي دارو ثورات كبيرة فنية في القصيدة وايضا بالعصر الأندلسي اللي جاب لينا فن الموشح اللي دار قطيعة مع الشكل التقليدي ديال القصيدة العربية وايضا جاب لنا قطيعة على المستوى الموضوعي في الانفتاح ديالو على مواضيع الطبيعة الى غير ذلك. 

وكيشوف انه في العصر الحديث تحققوا عندنا هاد الشروط من جديد، الحرية والاحتكاك الثقافي و وصلونا الى ميلاد القصيدة الذاتية، هنا احمد المجاطي كيمر مرور الكرام على التيار الإحيائي اي القصيدة التقليدية علاش؟ لأنه بالنسبة ليه مجاتبش لينا شي جديد كبير على المستوى الفني وانما الفضل ديالها كينحصر فقط في اعادة احياء القصيدة القديمة يعني بحال الا فيقات لينا شوية الإنسان العربي من عصر الإنحطاط، وخلاتنا نفكرو في تجديد المعاصرة وهادشي اللي غادي يوقع مع التيار الذاتي.

هنا غايوقف وقفة مطولة من التيار الذاتي وعند اهم الجماعات الرومانسية التيار الذاتي غايجيب لنا ثورة فنية وموضوعية في آن، اولا ان ايمانه بأن الشعر وجدان وانه يعني تعبير محض عن تجربة ذاتية وماخاصوش يكون رهين و مستلصق بالتجارب الجماعية الماضية التراثية غنبدا الجماعة الأولى.

جماعة الديوان 

جماعة الديوان أسسها اصدقاء شعراء لي هم عباس محمود العقاد، عبد الرحمان شكري، وعبد القادر المازيني و اتفقوا جميعا حول مبدأ اساسي ان الشعر وجدان بمعنى القصيدة خاصها تكون انعكاس للتجربة الوجدانية، العاطفية، الانفعالية ديال الشاعر، ولكن كان بيناتهم اختلافات في التعريف وتجسيد مفهوم الوجدان فقصائدهم مثلا عباس محمود العقاد الوجدان عندو كان مزيج ما بين الفكر وما بين الشعور وهاكا غاتبان فالقصائد ديالو الاستدلالات شبه منطقية، برهانية يعني على عكس باقي الشعراء، و عبد الرحمان شكري كانت القصائد ديالو اولا الوجدان عندو هو انفتاح على ما هو شعوري ولا شعوري، او هاكا كنلقاو عندو المونولوغ او الاستبطان او محاولة الغوص عميقا في الذات الانسانية، اما عبد القادر المازيني فكان الوجدان بالنسبة ليه هو التعبير عن العواطف او الاحاسيس او خاصة عواطف الالم اللي غترجمها يترجمها في الأخير بصورة شعرية فاخرة سوداء.

لكن الناقد احمد المجاطي كيحكم على هاد الجماعة بالفشل علاش؟ لأنه كيقولنا ان التغيير لي جابوه لنا هو تغيير نظري فقط ماتجرؤوش على مستوى التطبيق حتى المواضيع ديالهم فعلا كانت فيها جرأة وارتبطت القصيدة بالتجربة الذاتية اساسا ولكن على مستوى الصورة وعلى مستوى الايقاع مكانش أي تغيير يذكر وهاكا غادي ينقلنا للجماعة الثانية 

جماعة الرابطة القلمية 

جماعة الرابطة القلمية او جماعة المهجر ايضا غادي يأسسوها مجموعة من الاصدقاء في امريكا الشمالية وعلى رأسهم جبران خليل جبران، وميخائيل نعيمة، اليا ابو ماضي، عبد المسيح حداد وغيرهم من الشعراء، هادو ايضا غيآمنوا بان الشعر وجدان، ولكن الوجدان عند هاد الشعراء خدا بعد اخر بعد روحي و تأملي لان بحكم اقامة هاد الشعراء في امريكا الشمالية نفتحو بشكل كبير على الادب العالمي، وهكا تحقق عندهم شرط الاحتكاك التقافي وتحقق عندهم اي شرط الحرية وهكا احتكاكهم بالادب العالمي اضافة الى اهتمامهم الكبير بالتصوف العالمي خدا الوجدان عندهم البعد الروحي التأملي اللي غايخليهم فالنهاية يهربوا گاع الى الطبيعة والتأمل فالغابة والعيش فيها الى النهاية. 

وهادي اللي غادي يعتبرها احمد المجاطي نقطة سلبية وسوداء فتاريخ هاد الجماعة لأنهم واكبوا المد القومي ولكن مانخارطوش فه وهاكا غادي ينقلنا احمد سريعا الى الجماعة الثالثة.

جماعة ابولو

في الحقيقة ابولو هي مجلة اسسها احمد زَكي ابو شادي في الف وتسعمية وتنين وتلاتين 1932. ورحبت بكل الكتابات الجديدة, ابولو جات تيمنا بإله الشعر والموسيقى في الحضارة الإغريقية، وهكدا هي مكانتش جماعة وإنما مجلة انفتحت على الوطن العربي بكل بلدانه، وهنا غادي نلقاو اسماء كبيرة بحال علي محمود طه، ابراهيم ناجي، والكاتب الكبير والشاعر صاحب قصيدة "ارادة الحياة" لي هو ابو القاسم الشاذلي.

الجميل في جماعة ابولو هو انهم امنوا ايضا بأن الشعر وجدان و بأنه تعبير عن تجربة ذاتية وشعورية لكن انفتحو على مواضيع جديدة ومتعددة مواضيع قومية واجتماعية، وكنلقاو فقصائدهم موضوع الفقر موضوع اليتم، موضوع الوطن، موضوع المرأة والحب وغيرها، وغادي اتجرأو ايضا على المستوى الفني في استلهام الصورة ديال التجربة الذاتية لكنهم ايضا تجرأو على المستوى الايقاعي و تنويع الاوزان والقوافل الارواء، وجعلها مرآة تعكس الحالة النفسية للشاعر.

لكن احمد المجاطي من جديد كيقولينا ان جماعة ابولو فعلا نجحات في البدايات ديالها ولكن في النهايات غادي تسقط التكرار، فكرروا نفس المواضيع الهم والغم والنكد والبكا والمرض، وهي مجموعة من البكائيات لي على حد قولو الجمهور العربي مكانش محتاج داك البكاء كان محتاج النفس الايجابي القوي اللي غادي يحفزو يخرج ويحارب ويقاوم فالشارع، وهاكا غاتنتهي ايضا جماعة ابولو نهاية فاشلة. 

أسباب فشل التيار الذاتي

احمد المجاطي كيحكم عموما على التيار الداتي بالفشل وكيعطي لدلك تلاتة أسباب كبرى، اللول هو الهجوم لي شنو التيار المحافظ على الحراك الرومانسي، هجوم شرس منعو من النشر ومن الانتشار وغيرها، السبب التاني هو الصراع لي غادي ينوض فقلب القلعة الرومانسية ما بين اصدقاء شعراء بحال العقاد وعبد الرحمان شكري، حيت العقاد غادي يعتبر المحاولات ديال عبد الرحمان شكري للتجديد جريئة جدا وكتنسف البنيان ديال الشعر العربي، اما السبب الثالث هو المهم جدا هو نفور الجمهور العربي من مواضيع البكاء والحزن والغم الى غيرها. 

بيني وبينكم احمد المجاطي فهاد النقطة كان شوية جائر او ظالم، لأن التيار الداتي الى شفناه بعين ناقدة موضوعية فهو كان جريء وثوري جدا وجاب لينا الجديد على المستوى الفني والموضوعي بحكم السياق التاريخي ديالو، منساوش اننا كنا امام تيار محافظ قوي وان التيار الذاتي نسف مجموعة من المبادئ الفنية والجمالية لي عاشت اكثر من عشرة القرون، وبالتالي خاصنا نعتارفو بالفضل ديالو ويكفيه فضل انه مهد لينا باش ننتاقلو للقصيدة الحداتية القصيدة تكسير البنية و تجديد الرؤية. 

القسم التاني نحو شكل جديد 

هنا احمد المجاطي كيوقف عند اهم الخصائص الفنية والموضوعية لي ميزات القصيدة الذاتية او التجربة الذاتية لي هي التجربة الرومانسية بشكل متدرج، نبداو اولا من المعجم، زد على ذلك أنه كيعقد دائما مقارنة ضمنية ما بين الخصائص ديال القصيدة الذاتية والخصائص ديال القصيدة الاحيائية، الا كان المعجم في القصيدة الاحيائية تراثي بدوي فالمعجم في القصيدة الرومانسية الذاتية معجم بسيط مألوف وعادي، ايضا لغة ملف القصيدة الاحيائية تميز بالقدم وبالصعوبة ديال الفهم ديالها، اما اللغة في القصيدة الذاتية فهي لغة سلسة سهلة مفهومة وقريبة في أحيان كثيرة للغة اليومية، الصورة الشعرية في القصيدة الإحيائية هي صورة إحيائية بيانية مرتبطة بالذاكرة وبالتراث القديم أما الصورة في القصيدة الرومانسية الذاتية هي صورة تعبيرية انفعالية مرتبطة اساسا بالتجربة الذاتية للشاعر، الايقاع في القصيدة الاحيائية مقدس كيلتزم بوحدة الوزن والقافية والروي وكيلتزم بالقواعد العروضية عموما، الايقاع في القصيدة الذاتية هو ايقاع منفتح على التجربة الذاتية والشعورية للشاعر، وبالتالي عرف مجموعة من المحاولات النسبية في الاوزان، والقوافي والروي. 

اخيرا بالنسبة للموضوع، الموضوع في القصيدة الاحيائية موضوع قديم مستلهم من المواضيع والاغراض القديمة والبطولة والفقر والحرب وغيرها، اما الموضوع في القصيدة الذاتية فهو مستلهم اساساً من التجربة الشعورية الشاعر ومتميز بواحد النقطة مهمة هي الوحدة العضوية، اشنو كنقصدو بالوحدة العضوية هي تماسك كل اجزاء القصيدة في معنى واحد او موضوع واحد، وهادشي لي مكانش متوفر فالقصدة الاحيائية لي كانت كتمتاز بالتعدد في الموضوع يعني تلقى الغزل والفخر والمدح والحكمة، اما الشاعر في التجربة الذاتية الا كان كيكتب القصيدة على المعاناة فهي من الاول الى الاخير كلها على قيمة المعاناة.

خلاصة 

اذا هاكا الدراري وقفنا عند اهم الافكار والقضايا اللي تطرق لها احمد المجاطي في الفصل الاول التطور التدريجي في الشعر الحديث, يكفي نتوما تبعوا معايا غي باش تفهموها وغتلقاو الملخصات ديال الفصول الآخرين مختصرين وموجزين في المواضيع لي التحت، ومرحبا دائما بأسئلتكم في التعاليق تهلاو فروسكم وبسلامة عليكم، انشاء الله محدك كدير مجهود ربي مغيخيبكش الله اوفق ????.